15 taona sazy an-tranomaizina ny an’ny ramatoa iray izay voasokajy tamin’ny firaisana tsikombakomba tam’ny famonoana. Dimy taona ny an’ny mpividy ny fiara an’ilay mpitsara. Sazy an-terivozona mandram-pahafaty kosa ny an’ny telolahy izay nanatontosa mivantana ny famonoana sy ny fandevenana. Ho an’ireo olona am-polony hafa kosa dia nahazo fahafahana noho ny fisalasalàna izy ireo. Izay no didim-pitsaràna ady heloka bevava izay nahakasika ny famonoana ho faty an’i Rakotondravony Henri. Io farany dia mpitsara teo anivon’ny Fitsaràna ambony Mahajanga ary niakatra namita iraka teto an-drenivohitra no nisy namono tamin’ny fomba feno habibiana, ny volana jiona 2024. Teo Antsahadinta no nalevin’ireo olon-dratsy ary ny fanadihadiana izay notontosain’ny BC no isan’ny nahitàna ny razana. Taorian’izay no nosamborina ireo olona 18 ary nanokafana fanadihadiana. Nidoboka am-ponja (Tsiafahy sy Antanimora) ary nisy vehivavy koa tao anatin’ilay tambajotra. Isan’ny anton-dian’ilay mpitsara ny hivarotra ny fiarany sy hividy iray hafa eto an-drenivohitra tamin’io fotoana io. Izany dia ankoatry ny fanaterany ny valim-pifidianana any amin’ny fari-piadidiana nisy azy. Io vola io no nanintona ireo olon-dratsy izay nisy olona akaiky azy ihany tao anatiny. Niteraka hatramin’ny famonoana ho faty izany ary nandevenana an-tsokosoko ny razana teny Antsahadinta. Herintaona latsaka taty aoriana no nandeha ny fitsaràna teo anivon’ny ady heloka bevava ary voasazy an-terivozona mandram-pahafaty ireo tena nandray anjara mivantana tamin’ny famonoana. Efa alim-be ny alarobia teo vao vita ny fitsaràna ireo olona 18.
D.R
