Ny voalohan’ny volana janoary,tokony ho tamin’ny 3 ora maraina no nitrangana lozam-pifamoivoizana tetsy Ambohimanarina. Fiara Renault 4, nizotra ho aty An-drenivohitra no nifandona tamina fiara Renault 11 izay ho any Ambohidratrimo. Vokatry ny fifandonana mafy dia nirehitra tanteraka ilay fiara R.11, fa ilay 4L kosa ny tapaky ny lohany ihany no may. Olona mipetraka ao Anosibe no tompon’ilay 4L ary eny Soamanandrariny kosa ny an’ilay R.11. Naratra avokoa ireo olona telo izay tao anatin’ilay 4L ka isan’izany ny mpamily izay voalaza fa tapaka ny feny. Nalefa teny amin’ny hopitaly Loterana teny ambohibao izy ireo. Tsy nisy naratra kosa ireo mpandeha telo tao anatin’ilay Renault 11 fa tafavoaka soa aman-tsara daholo, na dia nirehitra aza ny fiara. Tonga nidina teny an-toerana ny mpitandro filaminana nijery akaiky ny toe-draharaha sy nanao ny fanadihadiana mahakasika ity loza ity.
A.R.
