Nahagaga ny be sy ny maro ny raharaham-pitsarana, antontan-taratasin’ady 1819/RP/25-IS/ST/LT, nitranga teto Toamasina ny faran’ny herinandro teo, satria raharaha fanolanana zaza efa-taona no lasa raharaha ady heloka tsotra, raha toa ka raharaha ady heloka be vava izany. Ity raharaha ity dia naha-voaroairoy an’Ingahy Randriamarolahy Nambinintsoa Francky, izay efa nohazonina am-ponja vonjimaika talohan’izao fitsarana izao, noho izy nalonana zaza efa-taona.
Maro ny hevitra nandeha fa tokony hiandrasana ny ady heloka bevava ny raharaha amin’ny resaka fanolanana zaza latsaky ny 15 taona ity, nefa dia niroso ihany ny fitsarana ny raharaha nandritra ity fotoam-pitsarana ity. Nandritra izany, raha nanontany ny mpitsara dia nambaran’ny ray aman-drenin’ilay zazavavy efa-taona fa tia milalao ireny « balançoire » ireny ny zanany eo an-tokotanin’izy ireo, ka izy milalao tsara iny no nantsoin’ity tovolahy ity niditra ny tranony, satria mifanila vodirindrina mantsy ity tovolahy ity sy ray aman-drenin’ilay zaza efa-taona voaolana. Raha nihidy aman-trano tao izy roa, dia noesorin’ilay tovolahy ny silipony ary ny azy ihany koa ary nentiny teo ambony fandriana ilay zaza efa-taona. Tao anatin’izany dia nasaina nilalao sy minono ny filahiany ilay zaza efa-taona, izay no fitantaran’ity zaza hatreny amin’ny polisy sy ny mpitsara mpanao famotorana.
Vokatr’izany dia tsy nanontany ilay zaza voaolana intsony ny fitsarana, fa nionona tamin’ny nambarany teo anatrehan’ny tompon’andraikitra nanontany azy teo aloha ny fitsarana. Miahihay, vokatr’izany, ny ray aman-drenin’ilay zaza voaolana, satria sao havotsotry ny fitsarana ity tovolahy mpanolana zaza ity. Voalazan’ireo ray amn-drenin’ilay zaza efa-taona mantsy fa efa nampidirina hopitalin’ny adala ilay tovolahy raha fantatry ny ray aman-dreniny fa ireny mpitsindrona zava-mahadomelina ireny ary efa saika lasa adala mihitsy vokatr’izany.
Noho ity fanolanana ity dia mangataka onitra ny ray aman-drenin’ilay zaza efa-taona ao anatin’izany, ny didim-pitsarana kosa mbola miandry kely ny famoahana izany, hoy ny fitsarana, saingy tsy nahazo famotsorana vonjimaika ilay tovolahy. Manao antso avo amin’ny fanjakana vokatr’izany ny ray aman-drenin’ity zaza efa-taona ity, ny mba hijerena akaiky ny raharaha tranga fanolana zaza efa-taona ity, satria lasa tsy misy dikany ny lalana norasin’ireo solombavambahoaka raha hiala maina ireo mpanolana zaza ireo.
Malala Didier
