Niakatra ny feo tetsy amin’ny « Consulat de France » omaly. Izany dia rehefa tsy nahazo ny « visa » izay ahafahany mandeha any frantsa ny artista malaza Ninie Donia. Tokony hamonjy ny zanany izay marary any ivelany izy no io semban-drahona tampoka io rehefa tsy nahazo visa. Niaka-peo vokatr’izany ary nanomboka teo dia efa niala avy any ny mpitandro ny filaminana vazaha tao amin’ny consulat. Raha ny filazan’izay nahita dia voatositosika izy ary mainka koa izany nampiakatra ny maripana teo an-toerana. Efa mpivezivezy matetika any ivelany ity artista ity, amin’ny maha-mpanakanto azy, fa efa monina any mihitsy koa aza izy raha amin’ny ankapoben’ny fotoanany. Tampoka teo dia tsy nahazo visa ahafahany miverina any aminy. Tonga hatramin’ny mpitandro ny filaminan’ny Emmo-Reg (jereo sary) nandamina ny raharaha tetsy Antsahavola. Nentina tamin’ny fiaran’ireo mpitandro ny filaminana izy ary nohenoina teny Ankadilalana. Raha ny vaovao farany dia efa navotsotra izy. Naneho ny tsy fifaliany I Ninie Donia momba ity nanjo azy ity. Nandeha be ny resaka tamin’ny serasera anatin’ny tranokala fa mety noho izy avy any Nosy-Be no anton’ity fandavana ny visa-ny ity. Nosy-Be izay toerana namonoana ho faty ireo vazaha roa, frantsay sy italiana, ary niteraka karazan’ny sazy ankolaka ho an’ny Malagasy. Lasa miha-sarotra ny fanomezana visa ary tsy vitan’izany aza fa na ireo gasy any ivelany dia lasa sarotra hoazy ireo koa ny mivezivezy ao anatin’ny tanin’ny frantsay. Isan’ny iharan’izany ny artista. Toa an’I tarika Wawa izay voatery naverina tao amin’ny seranam-piaramanidin’I Marseille. Ny antony dia mbola heverina koa fa noho izy avy Malagasy, tsy vitan’izany fa avy ao …nosy-be. Hita mibaribary ankehitriny ny sazy diplomatika ataon’ny Frantsay, taorian’ireny tranga tany Nosy-be ireny…
D.R
