Tsy nisy nanam-po ny fidinan’ny pôlisy sy ny CUA teny Analakely omaly. Nosavaina tsirairay ireo fiara nipetraka ka namidy teo an-toerana. Naiditra “fourrière” avy hatrany izay tsy nisy taratasy mazava. Nisy mihitsy aza tamin’ireo saofera no voatery nanokafana fanadihadiana. Nalalaka tanteraka ny teo anoloan’ny “arcade” vokatr’izany, satria nitsoaka teo avokoa ny mpanao bizna fiara. Raha tsiahivina dia efa nisy ny fanomezana azy ireo toeran-kafa, toy ny eny amin’ny marais masay, saingy niverina teo daholo ihany. Ny tsikaritra dia hay ireo fiara amidy no tena mameno an’Analakely ka lasa mampanahirana ny fitadivana “parking” ho an’ny olon-tsotra. Hita ho hentitra omaly ny mpitandro ny filaminana, izay nilaza fa hotohizana hatramin’ny farany ny fanalàna ireo eo an-toerana. Ilaina ny fandaminana toa izany satria sempotra tanteraka Antananarivo, indrindra iny ampovoan-tanàna iny. Ny mpivarotra antsisin-dàlana, ny mpivarotra fiara, ny mpivaro-mandeha dia saika eo avokoa no mifatratra, ny toeran-kafa anefa mipetra-potsiny…
D.R
