Ny talata teo, vehivavy iray indray no lasibatry ny mpanendaka anaty fiara nandritra ny fitohanan’ny lalana teny Ambanidia. Ny loharanom-baovao no nahalalana fa nihidy avokoa ny varavarana sy ny fitaratry ny fiarany nefa dia nataon’ireo olon-dratsy amboletra ny manoha izany. Tsy ela dia nivaha ary nalain’izy ireo avokoa ny zavatra sarobidy tao anaty fiara. Faritra maro misy « embouteillage » no andrenesana karazana halatra miharo herisetra eto an-drenivohitra. Na dia maro aza ny olona mbola eny an-dalana, tsy dia misy sahy manampy ireo voaendaka noho ny tahotra. Mitondra basy sy fitaovam-piadiana isan-karazany ry zalahy ary izay rehetra miseho ho sahisahy dia asiany avokoa.
Mirongatra ny asan-jiolahy amin’izao fotoana izao. Ny vaovao re etsy sy eroa no ahafahana milaza fa kartie maro no ipoiran’ireny olon-dratsy ireny. Toa manana ny fomba fanaony anefa ry zalahy satria dia tsy mamendaka na manao sinto-mahery ao amin’ny tanàna misy azy fa any amin’ny toerana hafa no mamely. Ohatra ny efa misy fifanarahana mangina amin’izy ireny.
r.s.