Nafotaka ny fifandonana teo amin’ny Zandary nampian’ireo Jamà 23 avy any Ankililoaka , hamaly faty ny naman’izy ireo efatra novonoin’ireo dahalo ekipan’ny Deba (Rafesy) sy ireo malaso 60 lahy mirongo basy mahery vaika (Kalachnikov 11, grenade offensive sy défensive 6 avy), afak’omaly alarobia, tao amin’ny kaominina ambanivohitry Maromiandra, distrikan’i Toliara II. Tsy nanaiky nilavo lefona mora ireo dahalo mpangalatra omby sy mpamono olona, fa nampiasa ny fitaovam-piadiany mahery vaika. Nanomboka tao amin’ny fokontany Ambohimahasoa tamin’ny valo ora naraina ny fifampitifirana, nitohy tao Andranoboka izay tanàna misy an’i Deba lehiben-dahalo ary nifarana tao amin’ny fokontany Ankarandoha ny fifandonana. Nitifitra tamin’ny « grenade FLG » ny mpitandro filaminana, avy eo narahina tifitra variraraka tamin’ny bala mamoaka afo, ka nitsoaka ireo dahalo.
Deba lehiben-dahalo, zandrina ben’ny tanàna. Trano 30 tafo mahery fonenan’ireo malaso may kila firehitra, dahalo iray maty voatifitra, raha telo azo sambo-belona. Jamà mpanara-dia iray kosa lavon’ny balan’ny malaso, raha telo hafa naratra mafy. Omby halatra 30, basy « revolver » roa niampy fanamiana mpitandro filaminana sarona tao an-tranon’i Deba. « Tsy hijanona ny fampandrian-tany ataonay raha tsy voasambotra Rafesy lehiben-dahalo zandrin‘ny ben’ny tanànan’i Maromiandra », hoy ny Chef d’Escadron Tsiketa Janvier Parfait, Commandant de Compagnie Toliara, nanao valandresaka tamin’ny mpanao gazety, omaly tao amin’ny birao fiasany.
Eric Man
