Sakaraha : Zazavavy 12 taona naolana rangahy 55 taona

Ankizivavy vao 12 taona monja no naolan’ny lehilahy iray 55 taona, tany amin’ny kaominina Mahaboboka Sakaraha, ny alin’ny alarobia teo. Raha ny vaovao voaray avy any an-toerana dia nilaza ho haka vady an’ity zazavavy ity tamin’ny ray aman-dreniny io raim-pianakaviana io. Misy anefa ny fombafomba samihafa tsy maintsy hatao vao afaka maka vady azy ity rangahy ity. Tsy nahandry izany ity farany fa nanampatra ny filan-dratsiny. Nitantara ny zava-nihatra taminy tamin’ireo nahitany masoandro ilay ankizivavy nony naraina ny andro. Raikitra ny kabary ambany kily noho ny fomba mamohehatra tsy fananjana ny fomban-tany nataon’ilay mpanolana.
Nandoa omby 5 sy vola 4 hetsy ariary. Voasazy nandoa omby dimy sy vola efatra hetsy ariary ny tenany. Anisan’ny mampirongatra ny herisetra sy fanararaotana ara-nofo ny habibiana atao amin’ny ankizy tsy ampy taona, amin’iny tapany atsimon’ny nosy iny, ny fomban-tany, satria mbola mahazo laka ny tokantranomaso fiandry hatramin’izao. Izany hoe : mbola kely ny zazavavy, misy vao teraka aza, dia efa misy mitily ho vady sahady.
Eric Man