Tamin’ny 22 jolay teo, tao amin’ny fokontany Andampy, kaominina ambanivohitra Nosiarina, distrikan’i Sambava, no nisy zazavavy kely iray 15 taona maty novelesin’ny olon-tsy fantatra tany an-tsaha, rehefa nirahin-dray aman-dreniny haka anana tany an-tanimbolin’izy ireo mba hatao laoka amin’ny sakafo antoandro. Tokony hiverina an-tokatranon-dray aman-dreniny izy tamin’ny antoandron’io ihany. Tsy tafaverina anefa ilay zaza hatramin’ny 2 ora tolakandro. Sahiran-tsaina noho io toe-javatra io ireo tao an-trano, ka lasa nanara-dia sy nikaroka azy tany an-tsaha sy an-tanimboly rehetra tany, niaraka tamin’ny fianakaviana tratra antso. Tsy hitan’izy ireo ilay zaza raha tsy efa tamin’ny 9 ora alina, ary efa maty. Vaky ny lohany, nihosin-drà ny tarehiny ary nahitan’ireo mpanara-dia sy ny dokotera ary ny zandary nijery ny razana tany an-toerana ny vato milanja kilao eo ho eo, feno rà nisy nametraka lavitra ny lohan’ilay zazavavy. Lehilahy iray no nahiahian’ny ray aman-dreniny sy ny fianakaviany ho nahavita ny heloka ary saika niharan’ny fitsaram-bahoaka tany an-toerana.
»Efa eo am-pelantananay zandary ato amin’ny Tobim-paritra ny Zandarimariam-pirenena eto Sambava ny raharaha ka efa mandeha ny fanadihadiana sy famotorana ary ny fikarohana ny nahavanon-doza », hoy ny kaomandin’ity tobim-paritry ny zandary ity.
REMI, Rakotonirina