Nitrangana fanafihana mitam-piadiana teny amin’iny faritra Ambohidratrimo iny, omaly hariva. Toby fivarotan-tsolika iray indray no lasibatr’ireo olon-dratsy. Lasa tamin’izany ny vola mitentina 12 tapitrisa ariary. Nirefodrefotra ny basy teny an-toerana, tokony ho tamin’ny fito ora sy sasany hariva teo ho eo. Enin-dahy no isan’ireo jiolahy raha ny filazan’ireo mponina teny an-toerana. Basy kalalch no nentin’izy ireo tamin’izany. Nandeha an-tongotra toy ny olon-drehetra izy ireo nanatona ilay fivarotan-tsolika, hany ka tsy nisy taitra, na ireo mpanjifa na ireo mpiambina. Nony tonga tao anatiny anefa izy ireo vao nampiseho ny maha-jiolahy azy. Tamin’ny fitsoahany vao nandrefotra ny basy teny an-tanany izy ireo, raha ny filazan’ireo mponina hatrany. Lasany tamin’izany io volabe io. Tsiahivina fa vao ny afak’omaly no nisy nanafika ny mpivaro-kena iray, tsy lavitra io toerana io. Efa tonga avy hatrany teny an-toerana ireo mpitandro filaminana. Ary hatramin’ny ora nanoratanay dia nambaran’izy ireo, azo an-tariby, fa mbola eo am-panaovana savahao ny toerana izy ireo.
m.L