Indroa nahita ny maizina ireo mpivarotra tamin’iny faritr’ Ivato sy ny manodidina iny ny sabotsy hariva teo. Taoriana kelin’ilay fanafihana teny Mamory Ivato mantsy, dia ny teny Ambohijanahary indray no lasibatry ny jiolahy valo nirongo basy. Mpivarotra mpamongady iray teny an-toerana ity niharan’ny fanafihana ity, tokony ho tamin’ny fito ora hariva teo. Basy avy hatrany no niantefa teny amin’ny tampin-kandrin’ireo tompon-trano, hany ka tsy afa-nanohitra ireto farany fa dia nanaiky izay notenenin’ireo olon-dratsy. Lasa tamin’izany ny vola mitentina valo tapitrisa ariary sy fahana finday manodidina ny iray tapitrisa ariary teo ho eo. Raha ny fampitam-baovao ny zandary dia tsy nanapoaka basy akory ireto farany nony nitsoaka. Petara no napoakan-dry zalahy ka nampisahotaka ny olona, nitangorona teo amin’ilay toerana lasibatra, sy nanafenan-dry zalahy ny fitsoahany. Taloha kelin’io fotoana io moa no nitrangan’ilay fanafihana nahafaty ilay mpiambina tetsy Mamory, hany ka mbola somary taraiky tany ny zandary. Na izany aza niezaka ny namonjy ny teny Ambohijanahary indray ry zareo, saingy efa nadio tanteraka ny rano nitan’ireo jiolahy. Mety ho ilay teny Mamory ihany ve ireo nanafika teny Ambohijanahary ireto ? Azo heverina ihany koa fa mbola ry zalahy no nanao ilay fivarotan-tsolika teny Ambohidratrimo. Efa eo an-dalam-panaovana fanadihadiana sy fikarohana ireo olon-dratsy ny zandary amin’izao. Fantatra ihany koa fa tamin’io sabotsy io ihany, dia nitrangana fanafihan-jiolahy, nirongo basy teny Anosiala Ambohidratrimo. Vola fito hetsy sy firavaka volamena maromaro no lasan’izy ireo tamin’izany.
m.L