Araka ny vaovao voaray dia olona telo hafa indray no fantatra fa maty nilatsahan’ny varatra tany amin’ny tanàna antsoina hoe Ambohidanerana, any Soaviandriana Itasy, tamin’ny faha-24 desambra lasa teo. Efa tamin’ny 6 ora hariva tamin’izay. Vory tao an-trano avokoa ny fianakaviana niandry ny sakafo hariva. Tampoka teo anefa, nirefotra ny varatra niditra ny trano. Voalaza fa niantefa avy hatrany teny amin’ireo telo mianaka, ny rainy, ny zanany vavy ary ny vinatolahy ilay izy. Maty tsy tra-drano teo izy ireo. Samy nahitana ratra avokoa ireo olona ireo, ilay rangahy nisy gaoka ny lohany, voa teo amin’ny fony ilay zanany vavy. Tsy nijanona teo ny fahavoazana fa nisy olona roa hafa torana tsy nahatsiaro tena.
Namono olona am-polony maro ny varatra tamin’ity taona ity saika nanerana ny faritra rehetra. Tany Antsirabe, herinandro maro lasa izay, ankizy efatra mianadahy no indray namoy ny ainy. Teo koa ny mpianaka maty tany Alaotra. Tamin’io fotoana io, niditra ny varavarana ny varatra, namono ankizy, nivoaka tamin’ny tafontrano bozaka. Voalaza fa tsy may akory ny tafo. Tany Fianarantsoa, olona enina be izao koa no indray maty vokatry ny filatsahan’ny varatra ihany. Teo koa ny tany amin’ny faritra Manjakandriana, Soavina izay nahafaty olona ihany koa. Ireo rehetra ireo sy izay tsy nahazoana vaovao dia ilazana fa tena nasiaka ny varatra eto amintsika tamin’ity taona ity.
r.s.
