Tovolahy iray tratra alina nandeha bisikileta, izay efa hiditra ny tanàna iray amin’iny lalana RN 44 mianavaratra miala ny tananan’Andranomena iny no narahan’ny lehilahy iray miboridana sy mangilohilon’ny menaka. Tsy nahatsikaritra mihitsy ilay lehilahy fa andian’olona avy niandry faty teo akaikin’ilay tanàna no nahatsikaritra izany ka nahatonga azy ireo nanavotra ity lehilahy nitondra bisikileta ity, izay efa tsy nahahetsiky ny tahotra. Raikitra ny fifanenjehana ka dia nirifatra tany anaty kirihitra ilay lehilahy izay voalazan’ny fokonolona fa mpamosavy ka tsy tratra intsony. Mateti-pitranga izao tranga izao, hoy ny fokonolona, ka tsy tokony handeha irery ny mpandeha indrindra eo anelanelan’ny tanànan’Imerimandroso sy Andreba rehefa amin’ny misasakalina. Toa lasa mirongatra mantsy ireto miasa amin’ny alina ireto ka tokony ho samy mailo ny rehetra.
Janus R
