Nitrangana asan-jiolahy mitam-basy indray tany Toliara ny talata hariva teo. Tokantranona mpivarotra mpamongady vary sy voamaina iray ao amin’ny fokontany Tsianaloka no voatafika ary lasibatry ny jiolahy mitam-piadiana, ka lasa tamin’izany ny vola 6 tapitrisa ariary niampy firavaka sy finday maromaro. Raha vao tafiditra tao an-trano ireo jiolahy dia nanambana basy avy hatrany. Tsy nanaiky ny handrobana ny fananany anefa ilay raim-pianakaviana ka nanohitra ireo jiolahy, ary naratra mafy voatifitra. Natahotra ny vady aman-janany avy eo ka nanome izay notadiavin’ireto olon-dratsy.
Ora iray sy sasany taorian’ny fanafihana vao tonga ny mpitandro filaminana, na dia efa nisy nampandre mialoha nandritra ny poa-basy nanakoako teo an-tanàna, araka ny fitantaran’ilay ramatoa voaroba. Nandositra nakany Besako ireo jiolahy mitam-basy ary tsy nisy olona teo an-tanàna sahy nanaraka azy ireo. Mbola karohina ireo olon-dratsy hatramin’izao, raha ny vaovao voaray farany.
Eric Manitrisa