Nahazo laka indray tato ho ato amin’iny tapan’ny avaratry ny nosy iny, araka ny vaovao voaray, ny fanaparitahana vola sandoka, ka misy amin’ireo olon-dratsy manadio izany. Ny asabotsy hariva teo, tokony ho tamin’ny 5 ora sy sasany, dia tovolahy iray 26 taona no voasambotry ny zandary tao anatina “bar” iray any Masonandrongo, distrikan’i Vohémar, izay tra-tehaka teo am-pisotroana toaka niaraka tamin’ny vola sandoka iray alina ariary miisa 86. Raha ny loharanom-baovao akaiky ny mpitandro filaminana dia efa ela no narahi-maso ity tovolahy ity noho ny fitarainana maro voaray, ka izao sarona izao ny asa ratsiny, raha mbola karohina kosa ny atidoha mpanamboatra ireto vola sandoka.
Eric Manitrisa
