Saika isan’andro no andrenesana fahatratrarana olona mitondra sy mivarotra rongony ety amin’ny manodidina ny renivohitra. Vao tsy ela akory, tamin’ny sabotsy lasa teo tokony ho taminny 8 ora alina, nahazo vaovao ny polisy misahana ny ady amin’ny fihanahan’ny zava-mahadomelina fa misy rongony nentina kamiao naidina teny Ifarihy By-Pass. Rehefa tonga teny an-toerana ireo mpitandro filaminana dia nahatratra lehilahy 30 taona mipetraka eny Namontana niaraka tamina rongony 3 gony milanja 45 kg. Tamin’ny famotorana azy no nahafantarana fa nohafarana avy any Atsimo ireo zava-mahadomelina ireo. Vidiany 100 000 ariary ny iray gony ary amidiny 250 000 ariary avy eo rehefa aty an-drenivohitra. Nilaza koa izy fa efa ela no nanaovany ity varotra rongony ity. Omaly alatsinainy no natolotra ny Fampanoavana etsy Anosy ilay lehilahy.
Nangonin’i r.s.
