Mirongatra izay tsy izy ny fangalarana lavanila amin’izao fotoana izao noho ny fahatsaran’ny tsena. Omaly, tao amin’ny distrikan’i Vohémar, 3 lahy voalaza fa mpangalatra lavanila no maty tsy tra-drano lavon’ny balan’ny zandary. Raha zohina ny zava-niseho, 6 izy ireo no niaraka nanafika tanimbolin’olona ny alin’ny talata lasa teo. Marihina fa nirongo basy izy ireo nandritra izany fanafihana izany. Tratran’ny fokonolona teo am-panaovana ny asa ratsiny anefa ireto farany ka dia raikitra nanomboka teo ny fifanenjehana. Nisy ihany koa ireo niantso ny zandary mba hanara-dia ireo mpangalatra. Vokany: omaly maraina ihany dia tra-tehaky ny zandary nandeha tongotra tao amin’ny kaominina ambanivohitra Tsarabaria, faritra Analanana izy enin-dahy ireo. Nisy arak’izany ny fifampitifirana teo amin’ny roa tonta. Telo tamin’ireo mpangalatra no lavon’ny balan’ny zandary fa ny telo ambiny kosa mbola tafatsoaka. Mbola eo am-pikarohana ireto namany tafatsoaka ireto ny zandary amin’izao fotoana izao. Ny fatin’ireo mpangalatra telo lahy kosa dia navelan’ny olona eo an-tokontanin’ny hopitaly Ampanefena. Andrasana izay mety ho tohin’ny fikarohana.
Niony H.
