Herinandro vitsivitsy izao no niseho ity famonoana zandary roa ity tamin’ny fomba mahatsiravina, tany amin’ny faritra Ambato Boeny. Norasarasaina tamina zava-maranitra ireto mpitandro filaminana roalahy ireto. Raha jerena amin’ny sary, tsy nananan’ireo mpamono antra mihitsy ireto olona ireto. Nisy dian’antsy: ny tongotra, ny tarehy, ny faritra hafa amin’ny vatany. Nandeha avy hatrany ny fanadihadiana nataon’ny mpitandro filaminana ka fantatra izao, fa olona folo voarohirohy amin’ity zavatra ity no efa nosamborina. Ny loharanom-baovao hatrany no nahafantarana, fa nandeha nanao fisafoana ireto mpitandro filaminana ireto. Natory tao amin’ny tanàna iray niaraka tamin’ny fokonolona tao an-toerana. Tamin’izay fotoana izay anefa, efa nisy dahalo hanafika. Taorian’ny famonoana dia fantatra fa basy kalaky roa no very niaraka tamin’ny bala. Taorian’ny fanadihadiana no nahazoana nisambotra ireo olona folo.
r.s.