Mirongatra tanteraka ny asa ratsin’ireo tsy mataho-tody indrindra fa eny amin’iny faritra Andravoahangy iny, ny andro alarobia moa no tena maro ary tsy voatanisa izy ireo araka ny maha betsaka ireo mpiantsena, satria tsenan’ Andravoangy tokoa io andro io, misy amin’izy ireo no mbola zaza ary misy kosa no efa zokiolona. Mpanendaka iray indray no tratra ny alarobia teo , raha saika hanendaka renim-pianakaviana iray, izay niaraka tamin’ny zazakely mbola menavava, tokony ho tamin’ny 11 ora sy sasany antoandro teo. Araka ny fomba fanaon’ireo tompon’andraikitra eny an- toerana moa dia izay tratra dia iny volony iny no hetezana, na lahy na vavy tsy misy fanavahana, raha zavatra mbola tsy dia tena lehibe toy ny(radio, kapa, akanjo, ny harom-paosy sns,,,,,) fa ny an’ity mpanendaka iray ity kosa niaraka tamin’ny fitsaram- bahoaka, nanamparan’ireo vahoakan’Andravoahangy ny fony. Araka ny fanazavan’ireo mponina sy mpivarotra eny amin’iny faritra iny dia toa efa isaky ny alarobia no misy tratra eny, naratra mafy dia mafy tokoa moa ity mpanendaka ity, indrindra fa ny lohany sy ny tarehiny izay tena voan’ny ny totohondry mafy. Tsy vitan’ny totohondrin’olon-tokana fa an’olona maro tokoa ary saika tsy niala raha tsy efa tonga ireo tompon’andraikitra nandamina ny teny an-toerana.
FINARITRA (Stagiaire)