Raha vao tamin’ny herinandro iny, no tra-tehaky ny zandary, ny andian-jiolahy mpanakan-dàlana eny amin’iny lalam-pirenena fahafito iny, dia ny alarobia alina teo indray no nisy trangam-panafihana teo Ambatofitorahana, kilaometatra vitsy tsy hiditra an’Ambositra. Taxi-brousse telo no indray niharan’ny fanafihana tamin’ity indray mitoraka ity, saingy ireo mpandeha tao amin’ilay taxi-brousse voalohany no tena lasibatra. Araka ny fampitam-baovao avy tany an-toerana, dia nobahanan’ireo olon-dratsy ny làlana. Nahita izany ireto fiara telo nitandahatra, dia saika hihodina hiverin-dàlana. Sendran’ny sampona anefa ilay voalohany ka tafahitsoka tanaty lavaka. Teo no nohararaotin’ireo olon-dratsy notafihana. Lasan’ireo olon-dratsy ny entana rehetra sy ny vola tany amin’ireo mpandeha, tsy vitan’izay fa mbola noratrain’ireo mpanafika tamin’ny zava-maranitra ihany koa ny sasantsany tamin’ireo mpandeha. Ilay fiara faharoa kosa afaka, voatoraka tamin’ny vato, saingy afa-nitsoaka ihany. Tsy naninona kosa ilay fiara fahatelo, raha ny fampitam-baovao avy tany an-toerana hatrany. Nampandrenesina avy hatrany moa ireo mpitandro filaminana ary tonga teny an-toerana nanao ny savahao ny manodidina, sy ny fikarohana ireo olon-dratsy. Nentina notsaboina kosa ireo mpandeha naratra.
m.L
