Lehilahy iray sahabo ho 30 taona eo ho eo no nanindrona antsy ny kibony ka nipotsaka tsinay, omaly nisandratra andro, tany Toliara. Niboba ny rà ary mbola miady amin’ny fahafatesana ny tenany noho ny ratra mafy nahazo azy, hatramin’ny ora nanoratana ny lahatsoratra, araka ny vaovao voaray. Raha ny fanazavana azo dia voasoketa ho nangalatra volamena tamina tokantrano iray tao Tsimenatse ity tovolahy voalaza fa mpidoroka rongony ity. Ankevitry ny natahotra ireo olona nanenjika azy hanao fitsaram-bahoaka izy, ka ny zava-maranitra teny aminy no avy hatrany dia nadidiany ny kibony. Nihevitra ny olona fa nody adala ity lehilahy ity rehefa ho voasambotra, kanefa dia notanterahiny tokoa ny tao an-dohany, ary teo vao zendana ireo nanatri-maso noho ny fasahiany.
Eric Manitrisa
