Tao aorian’ny fanaovana hazalambo sy fandroahana ireo Srilanke sy vahiny hafa mpividy vato taty Ambatondrazaka , ka nahatonga ireo vahiny ireo hitsoaka sy hiala ny tanàna herinandro lasa izay . Gaga sy talanjona ny rehetra, fa niverina avokoa ireo vahiny mpividy vato ka tsy misy sahy miteny ireo tompon’andraikitra. Manomboka misokatra avokoa ireo trano fivantanan’izy ireo , manomboka mitombo ihany koa ireo olona tonga miditra ny kariera hitrandraka vato .Na dia nandray andraikitra aza ny fanjakana teto an-toerana amin’ny maha faritra arovana io toerana io, dia izao mazava izao fa mbola misy olona mahitahita sy tsy maty manota foana. Mitombo ihany mantsy ireo toerana fitrandrahana vato misokatra aty Alaotra amin’izao fotoana izao ,toerana iray tsy lavitra ny tanàna indray no nisy nahita vato ,ka tsy maintsy hamonoana omby hoy ny fanazavana vao azo trandrahana ka ho hita eo indray ny ho tohiny. Amin’ny ankapobeny hoy ny fanazavan’ny rehetra, dia tombony ho an’ny vahoaka aty Alaotra sy ny Malagasy ny fisokafan’ireo kariera ireo, satria nahitan’ny vahoaka tombontsoa maro.
Janus R
