Niteraka famonoan’olona ny ady tany tao amin’ny Kaominina ambanivohitra Mahazoarivo Distrikan’i Vohipeno. Tovolahy iray no maty tsy tra-drano voatoto vodim-basy teo amin’ny lohany, ny asabotsy naraina teo, tokony ho tamin’ny 05 ora sy sasany, tao amin’ny « croisement » Tamboholava. Raha ny fampitam-baovao nataona olom-boafidy iray avy any an-toerana, misetrasetra ireto mpamono olona milaza fa mpanam-bola satria mpivarotra, ary mirehareha fatratra ihany koa izy ireo fa mahitahita manana olona ambony lava tanana miaro azy, ka mieboebo eraky ny tanàna. « Tsy ekenay ny fanamparam-pahefana sy ny didin’ny be sandry ary fampihorohoroana ataon’ireto mpamono olona sy mpandrava fananan’olona ireto, ka mitsangana ny vahoaka hanohitra izany satria tany tan-dalàna i Madagasikara », hoy ity olom-boafidy ity nampiaka-peo, manaitra ny tompon’andraikitra mahefa hijery akaiky ny raharaha.
Eric Manitrisa
