Toa lasa tsinontsinoavina ny aretina pesta aty Alaotra ka mampatahotra ny vahoaka amin’izao fotoana izao .Raha Ankerana Andilamena no nahitana olona maty nanodidina ny 7, vokatr’io ny aretina io teo aloha, dia niampy ny tao Amparafaravola izany, ka olona iray aloha no voaporofo fa maty .Olona 14 no noahiahiana tao Amparafaravola, ka voaporofo fa ny 5 no voany ka nandraisana fanapahan-kevitra. Tafakatra 8, araka izany, ny matin’ny pesta taty Alaotra, ankoatra an’ireo tsy fantatra mazava .Nandray ny andraikiny ny vahoaka ka nisian’ny fanadiovana faobe, ny faha 4 desambra 2014 teo, tao Amparafaravola, ka nandraisan’ny vahoaka tsy ankanavaka ny andraikitra. Niala vola am-paosy tamin’ny fanondrahana fanafody DDT sy ny maro hafa hamonoana parasy. Mendrika ny fandraisana andraikitra fa andrasana kosa izany hataon’ny fanjakana foibe, satria tsy ny vahoaka irery no hahavidy ny fanafody hamonoana parasy. Andrasana ny fandraisana andraikitra matotra ataon’ny fanjakana hahafoana ny aretina pesta.
Janus R