Rehefa nanaovan’ny mpitandro filaminana vela-pandrika tao anatin’ny fotoana naharitra, taorian’ny fitoriana nifanesisesy niisa 16, dia tra-tehaka ny talata lasa teo, tao an-tanànan’i Betorabato (toerana niafenany) any amin’ny Distrikan’Ambalavao, ny dahalo miisa dimy notarihan’i Rasta. Rehefa naheno ny vaovao ireo mponina avy an’i Mahaditra, Anjomà, Kirano, Vinanitelo, . . . lasibatr’ireto andian-dahalo mitam-basy malaza ratsy amin’ny halatra omby sy vono olona ary fanolanana ireto, dia nirohotra ary saika handoro velona an’i Rasta sy ny ekipany, kanefa nalaky voafehy ny toe-draharaha. Araka ny loharanom-baovao akaiky ny mpitandro filaminana mandray an-tanana ny fanadihadiana, dia efa nokarohina hatry ny ela ity lehiben-dahalo raindahiny ity, saingy izao vao tratra i Rasta sy ny ekipany. Nandritra ny famotorana natao dia niaiky tanteraka ny asa ratsiny ireo dahalo. Mbola karohina fatratra kosa ankehitriny ny omby 88 isa lasan’ireto malaso.
Eric Manitrisa