Nirefodrefotra ny basy teny amin’iny faritra Ambanidia iny, tsy lavitra ny toeram-pivarotana lehibe iray teny an-toerana. Araka ny fampitam-baovao avy amin’ny seraseran’ny pôlisim-pirenena dia fifanenjehana tamin’ny jiolahy no nitranga teny. « Androany (ndlr omaly) dia nahazo angom-baovao marim-pototra ny polisy avy ao amin’ny boriborintany faharoa fa hisy fanafihana mitampiadiana ataon’ny jiolahy etsy Ambanidia Ankazotokana. Niara-nidina teny an-toerana avy hatrany ny polisy avy ao amin’ny « unite special d’intervention » sy ny polisin’ny boriborintany faharoa tokony ho tamin’ny roa ora tolakandro teo ». Nifanehatra tamin’ireo olon-dratsy tokoa ireo pôlisy tonga teny an-toerana. Iretsy voalohany kosa, raha vao nahita ireo mpitandro filaminana dia nitifitra avy hatrany. Olon-tsotra iray, izay teo ambony môtô no voan’ny balan’ireo olon-dratsy araka ny fampitam-baovao hatrany. Naratra mafy moa ity farany, izy voan’ny bala teo amin’ny tongony. « Raikitra ny fifanenjehana sy ny fifampitifirina ka tra-tehaka teo akaikin’ny « tunnel » Ambanidia niaraka tamin’ny basy poleta miaraka amin’ny bala ny jiolahy iray fa tafaporitsaka kosa ny iray hafa ». Ilay olon-tsotra naratra kosa, raha ny fanazavana azo hatrany dia efa nentina nihazo ny toeram-pitsaboana. Mbola mitohy hatramin’ny ora nanoratanay omaly kosa ny fikarohana sy savahao ataon’ireo mpitandro filaminana an’ilay jiolahy tafatsoaka.
m.L
