Nalainy ny volabe tao anaty sakaosy mihidy. Notatahiny izany ary lasany ny vola mitentina 14 tapitrisa ariary. Teo Volosarika Ambanidia no nitranga ity halatra ity. Navelany teo ny trano dia iny izy no tsy hita, nanjavona niaraka tamin’ny vola. Raha araka ny fanazavan’ny polisy miandraikitra ny boriborintany faharoa dia sady mipetraka ao amin’ny fianakaviany ao Tsiadana izy rehefa tsy miasa. Rehefa narahina izany dia efa tsy tao intsony ilay vehivavy sahabo ho 30 taona. Nobatainy tao avokoa ny entany rehetra ary tsy hita izay nalehany. Nitohy ihany ny famotorana ary nanomboka hita soritra fa nifindra eny Ampitatafika izy, nanorim-ponenana vaovao. Nitombina tokoa izany rehefa nandeha ny fikarohana. Hita ny trano nofainy ary natao ny fisamborana. Rehefa nosavaina ilay toerana dia feno entana sy kojakoja vaovao. Nosoloiny avokoa ny fanaka sy ny zavatra maro. Mbola hita niaraka taminy koa ny volabe, izay efa ny antsasany sisa, izany hoe fito tapitrisa ariary. Tsy afaka nandà intsony ilay vehivavy ary dia nidoboka am-ponja noho ny halatra rehefa natolotra ny fampanoavana. Mba mila fantatra ihany ny olona miditra ao an-trano, indrindra ireo iaraha-miaina. Tombony tamin’ity tranga ity ny fahafantarana ny fianakaviany. Raha tsy izay dia mbola sarotsarotra ny fikarohana ity vehivavy ity.
D.R
