Nanararaotra tanteraka ny tsy nahateo ny ankabeazan’ireo mponina ireto tontakely ka nanao izay danin’ny kibony tanteraka. Tokatrano maromaro tao amin’ny tananan’Ambohibao, no nasesisin’ny jiolahy novakiana tao amin’ny fokontany Ambohimiadakely, kaominina Ambatofahavalo, ny alahady lasa teo. Araka ny fampitam-baovao azo dia saika lasa nandeha niangona avokoa ireo mponina. Tokatrano telo araka izany no fantatra fa nataon’ireo tontakely lasibatra ka nahazoan’izy ireo entana maromaro sy vola. Toy tsy teo izy ireo, rehefa avy « namafa » tanteraka ireo tranon’olona avy nandalovany.
Nandray andraikitra avy hatrany ny zandary tao an-toerana, raha vao nahazo fitarainana ary nanao izay nikarohana ireto olon-dratsy mpanao ratsy ireto. Raha ny fanazavana azo, taorian’ity tranga ity dia voamariky ny fokonolona tsy lavitra teo fa misy tovovavy mivarotra vary tamin’ny gony sy entana maromaro. Nampiahiahy avy hatrany ny fihetsiny, indrindra fa hoe nisy tokatrano maromaro vao avy lasibatry ny mpamaky trano teo an-tanana. Nampandrenesina ny mpitandro filaminana ary nosamborina sy natao famotorana ity farany. Nibaboka tokoa ikalakely fa entana avy nangalarina ireto nezahiny namidy ireo. Tsy ela moa dia nanondro ireo olona mpiray petsapetsa taminy izy : telo lahy, izay tompon’antoka tanteraka tamin’ity asa ratsy ity. Nosamborina avy hatrany ireto farany ary notanana natao famotorana ao amin’ny biraon’ny zandary, mialohan’ny hanolorana azy ireo eny anivon’ny fitsaràna.
m.L
