Na dia eo aza ny ezaka fampandrian-tany iadiana amin’ny asan-dahalo any Ambatofinandrahana, dia mbola faritra mena amin’ny asan-dahalo ity Distrika saro-dalana any amin’ny Faritra Amoron’i Mania ity. Taorian’ny fanafihan-dahalo nahery vaika niseho tao Natoriana, Kaominina ambanivohitra Mandrosonoro, ny zoma teo, izay nahaverezana omby, vary, fanaka saro-bidy ary nahafatesana vehivavy roa mpiray tampo, dia nanao ny fanarahan-dia ny Zandary nampian’ ireo Lambamena (andrimasom-pokonolona) rehefa naharay antso vonjy (koka). Tao anaty fanarahan-dia, nifanehitra tamin’ny mpitandro filaminana ireo dahalo, ka raikitra ny fifadonana teo amin’ny roa tonta. Vokany : dahalo efatra maty voatifitra, efatra hafa azo sambo-belona. Lambamena mpanara-dia telo kosa naratra mafy voatifitry ny dahalo, raha ny vaovao voaray.
Eric Manitrisa
