May kila hotohoto nisy nandoro ny harivan’ny alatsinainy teo ny EPP ao Ikatelo, ZAP Soavina, Cisco Ambatofinandrahana. Rindrina sisa mijoro ankehitriny, fa lasa lavenona avokoa ny fanaka sy ny kojakojam-pianarana tao. Raha ny vaovao voaray, dia ezaka madiodion’ny Fokonolona no nanangana ny trano misy efitrano efatra, folo taona lasa, nefa izao potika izao. Noho ny hetraketraky ny tsy mataho-tody, dia ankizy maherin’ny 200 no tsy afaka mianatra. Manoloana an’ity voina ity, dia sahiran-tsaina ireo mpampianatra FRAM miisa fito izay misahana ny fampihodinana an’ity sekoly ity. Vaky loha koa ny Ray aman-dRenin’ny mpianatra amin’ny hoavin-janany. Fotoam-pambolena izao any amin’ny Faritra Amoron’i Mania, ka sahirana ny tantsaha izay miantso vonjy amin’ny Fanjakana mba hanarenana haingana ny fotodrafitrasa sy ny fampitaovana ary handraisana ho mpiasam-panjakana ireo mpampianatra FRAM.
Eric Manitrisa