Samy niara-niaina ilay tafio-drivotra, narahina ora-mikija havandra ary varatra iny avokoa ireo mponina teo am-povoan-tany, na ny teto an-drenivohitra izany na ireo tany amin’ny manodidina, ny tolakandron’ny sabotsy teo. Araka ny angom-baovao azo, ankoatra ny fahasimban-javatra dia nisy aina nafoy tao anatin’izany ary faharatrana maromaro, tany amin’iny distrikan’Ambatolampy iny.
Tany amin’iny faritra iny, araka ny angom-baovao hatrany, dia tena nirefodrefotra ny varatra, naharahin’iny oram-be niampy tafio-drivotra ary havandra iny. Renim-pianakaviana iray, 21 taona tao Tsarazaza, fokontany Ambanimaso II, an-tampon-tananan’Ambatolampy no maty tsy tra-drano vokatry ny filatsaham-potaka. Nisy olona hafa ankoatra azy kosa no naratra ary mbola eo an-dalam-pitsaboana. Ankoatra io anefa, dia raim-pianakaviana iray, 42 taona ihany koa no maty tao Ambahondrano, kaominina Belambo, distrikan’Ambatolampy hatrany, vokatr’izay varatra nilatsaka izay hatrany.