Tanana iray, antsoina hoe Ambatondrakalavao ao amin’ny distrikan’Ambatolampy indray no lasibatry ny andian-dahalo mirongo basy sy zava-maranitra ny faran’ny herinandro lasa teo. Vokany, olona iray no maty vaotrobaky ny antsy, ary olona iray hafa, no naratra mafy voatifitra. Aman-tapitrisany maro kosa no vola sy ny tetibidin’ireo entana lasan’izy ireo Tokony ho tamin’ny 10 ora sy sasany alina teo ho eo no nigadona tao an-tanana ireto malaso ireto. Nifedrefotra tsy hay nifandrenesana ny feom-basy tamin’io fotoana io, nanaitra ireo mponina izay efa rendrika tao anatin’ny torimasony. Tahotra, horohoro, izay no nanjaka tamin’io tanana kely io tamin’io alina io. Izay olona sendra ireto olon-dratsy, sahy nitsirika azy ireo no avy hatrany dia nonjinjainy. Trobaka antsy avy hatrany no niantefa tamin’ity lehilahy iray, nifanehatra tamin’izy ireo. Maty tsy tra-drano moa ity farany. Nisy lehilahy iray kosa, izay nambara fa mpampianatra iray tao an-toerana ihany koa no voan’ny balan’ireto dahalo ireto. Tokantrano maromaro tao an-tanana no voatafika taorian’io, izay nanaranan’ireto olon-dratsy ireto fo mihitsy. Rehefa lasa moa izy ireo vao afaka nifamonjy sy niantso vonjy ireo mponina. Efa tonga tany an-toerana kosa ireo zandary misahana ny faritra any, ary efa mandeha ny fikarohana ireto olon-dratsy ireto raha ny fantatra.
m.L