Fahanteran’ny fotodrafitrasa sa fanapotehana niniana natao ? Fiaran-dalamby iray, hihazo an’Antananarivo no nivadika tetsy amin’ny PK 57, teo amin’ny toerana antsoina hoe Andanona, fokontany Ambatomivahy, kaominina Ambatolaona, distrikan’i Manjakandriana omaly atoandro. Araka ny fampitam-baovao azo dia vokatry ny fahatahapan’ireo “traverse” hazo miisa anankiroa mitsivalana mihazona ireo lalamby no vokatr’izany. Nitondra solika (gazoil) avy any Atsinanana handeha hiakatra aty an-drenivohitra ity fiaran-dalamby ity no izao tra-doza teo an-toerana izao. “Wagon citerne” dimy no feno izay solika izay, raha tsy nisy n’inona n’inona ny anankiray. Ny roa tamin’ireto “wagon citerne” no niongana sy nivadika, raha ny fampitam-baovao azo, rehefa nihotsaka ilay lalam-by ary niala tamin’izany ireo kodiaram-by an’izy ireo. Soa ihany, fa tsy nisy very ireo solika, tao anatiny, raha ny fampitam-baovao azo. Tsy nisy ihany koa ny olona naratra na ny namoy ny ainy. Rehefa nahare ny loza nihatra tamin’ireto fiaran-dalamby ireto moa ireo zandary avy ao amin’ny zana-tobim-paritra Ambatolaona dia nidina avy hatrany teny an-toerana, nijery ifotony ny zava-nisy sy nametraka avy hatrany ny fiarovana ireto entana ireto teny an-toerana. Ny lozam-piaran-dalamby tahak’itony moa dia ny pôlisy manokana misahana ny fiaran-dalamby no manao ny fanadihadiana rehetra : ny antony izay mety ho nahatonga izany loza izany.
m.L
