Ankizy mpianatra matahotra ,mihorohoro ,mitomany ,mikiakiaka, misy mihitsy ny tsy mety mandeha mianatra noho ny tahotra , vokatry ny fisian’ny Ambalavelona tao amin’ity sekolim-panjakana iray eto Ambatondrazaka ity. Raha efa nakatona nandritra ny 3 andro ity sekoly ity ,dia nosokafana ny alatsinainy faha 18 aprily 2016 teo rehefa avy niasana sy nivavahana. Mpiandry sy mpivavaka maro no niara-nanangan-tsaina tamin’ny mpianatra ny maraina , izay narahana fanompoam-pivavahana. Ankizy ampolony indray no niara-nihetsika Ambalavelona taorian’ny vavaka mahery nataon’ny mpiandry ,nisahotaka mihitsy ireo mpianatra izay nisy hatrany amin’ny kilasy 6ém ka hatramin’ny 3ém, ka ireo ankizivavy no betsaka voa . Ny ankizy tao amin’ny kilasy 6ém no tena betsaka voa , ary nihorohoro avokoa ireo tsy voa . Mampalahelo ny mahazo ny mpianatra amin’ity sekoly ity ka tokony hisy fepetra hentitra horaisin’ny tompon’andraikitra ,satria mety hanimba ny hoavin’ny mpianatra amin’izao telovolana farany izao . Ny zavatra hita ihany koa dia samy nilanja baiboly sy fihirana tsirairay avokoa ireo mpianatra ,ka niara-nanofahofa izany ambony niaraka tamin’ny hira fiderana ka nampihetsi-po ireo nitazana . Raha an-taonany maro lasa izay no nitrangan’izany tao amin’ity sekoly ity ka nanakatonana azy ihany koa dia izao miverina izao indray ity asan’ny devoly ity ka inoana fa hisy ny fandraisana andraikitra, hoy ireo ray aman-dreny nivory tao amin’ny sekoly, ny faha 16 aprily 2016 teo hanafoanana izao asan’ny maizina izao.
Janus R
