Na dia mbola tamin’ny 6 ora sy sasany hariva aza ny andro izay fotoana mahabetsaka ny olona eo amin’ny tsenan’Ambatondrazaka ny asabotsy faha 09 janoary 2019 dia jiolahy 4 miaraka amin’ny basy poleta iray no nanafika toeram-pivarotana iray teo ampovoan’ny tsena . Avy hatrany dia namoaka basy poleta ireo jiolahy no nilaza hoe « Aboay aby vola lemama » sady nobahanan’izy ireo ny varavarana miditra amin’ilay tsena , nilaza ireo tao an-trano fa efa tsy misy vola ao ,sady nanosika ireto jiolahy ireto hivoaka izy ireo ka raikitra ny ady saritaka. Novelesin’ilay tompon-trano seza ireo jiolahy , nasiany totohondry ka lavo teo ambany ny iray ,ny roalahy kosa nitady lalana hivoaka ary tafaporitsaka izay naka taxi- moto tsy lavitra teo haka ilay namany nianjera sy tavela tao an-trano , tamin’izay fotoana izay anefa dia vory ny olona ka nitifitra ireo tompon-trano ilay jiolahy niaraka tamin’ny moto ka niparitaka ireo vahoaka ary dia nalainy ilay namany tavela tao an-trano .Mpivarotra hanimasaka 15 metatra miala ilay toerana indray no voan’ny bala teo amin’ny feny ka nitolefika, renim-pianakaviana tsy nanampo ninoninona. Hita niparitaka teo amin’ny toerana kosa ny bala tany amin’ireo jiolahy .Tafaporitsaka avokoa ireo jiolahy efadahy rehefa nirohotra nilefa ireo vahoaka izay nisy ny niantso ny mpitandro ny filaminana ,kinanjo efa lasa lavitra ireo jiolahy vao tonga ireo mpitandro ny filaminana izay nanao ny fanarahan-dia fa mbola tsy nahitam-bokany. Efa matetika no misy jiolahy manafika tahaka izao eto amin’ny tsenan’Ambatondrazaka fa hatreto anefa dia mbola mitohy hatrany izany asa ratsy izany . Efa betsaka ireo tranom-barotra lehibe maka mpitandro ny filaminana miandry ny tsenan’izy ireo fa ireo tsy afaka manao izany dia izao iharan’ny fanafihana izao .Miantso fandraisana andraikitra hentitra ny vahoakan’ny renivohitry ny faritra Alaotra Mangoro.
Janus R