Noho ny fiaraha-miasa teo amin’ny Fokonolona nanome loharanom-baovao marim-pototra ny mpitandro filaminana, dia voasambotry ny Polisin’ Ambatondrazaka, tao Ambalavendrana, ny jiolahy raindahiny nampiaky ny maro amin’ny fanafihana mitam-basy sy fakana an-keriny any amin’ny distrikan’ Ambatondrazaka sy Tsaratanàna. Rehefa nofotorana lalina ity lehiben-jiolahy sarona, antsoina hoe : Randriamiarintsoa Mamy Benja Alain dit Mamy, dia nilaza fa izy no atidoha nikotrika ny fanafihana ny mpandraharaha japoney, tao Avaradrova Ambatondrazaka, ny 4 mey lasa teo, izay nahaverezana vola vahiny mitentina 700 dolara amerikana, 1000 Yen japoney sy 9 tapitrisa ariary ary finday 02. « Efa nigadra noho ny resaka « kidnapping » tamin’ny aogositra 2014 tany Soalazaina Ambatondrazaka ihany koa i Mamy », hoy ny Polisy. Raha tsiahivina, efa voasambotry ny Polisy, ny 19 mey lasa teo, ny naman’ity lehiben-jiolahy ity, miisa fito mianadahy (lehilahy 06, vehivavy 01), izay efa any am-ponja vonjimaika avokoa ankehitriny. Raha ny fanazavana azo hatrany, dia mbola eo am-pikarohana an’ ireo fitaovam-piadiana mahery vaika fampiasain’ireto jiolahy ireto ny Polisy amin’ izao fotoana izao.
Eric Manitrisa
