Nitoka-monina tanteraka ny tananan’Ambatondrazaka tao anatin’ny roa andro , noho ny fitokonana fanairana nataon’ny taksiborosy , ny fahatapahan’ny tetezana lehibe ao Sahabe sy ny faharatsian’ny lalana miditra sy mivoaka an’Ambatondrazaka .Vao mangiran-dratsin’ny Alatsinainy 16 febroary 2015 dia nisy nanongotra ny takelaby mandrafitra ny tetezana lehibe ao Sahabe Bejofo ,foana tanteraka ny takelaka efatra ka nikatso ny fifamoivoizana mankany Ampitandrefana. Nikatso tao ny fiara vaventy mpitatitra solika ho an’ny orinasa Jirama ,ny fiara vaventy mpitatitra kraoma sy ireo fiara mpitatitra olona avy any Ampitandrefana .Tsy nisy nandeha avokoa ireo mpitatitra mampitohy an’Ambatondrazaka sy Toamasina ary Antananarivo na dia maro aza ireo olona hihazo io toerana io noho ny fitokonana. Araka ny nambaran’ny tompon’andraikitra ao amin’ny Jirama, dia ho tapaka tanteraka ny jiro sy ny rano eto amin’ny tananan’Ambatondrazaka, raha tsy vita ao anatin’ny fotoana fohy io tetezana ao Sahabe io ,ka nentanina ny vahoaka ny samy hanangona rano daholo.Tsy fantatra na fifanandrifian-javatra na efa nomanina ny tsy fiasan’ireo mpitatitra sy ny fanendahana ny takelaby amin’ny tetezana ao Sahabe, fa dia nifanojo andro iray ireo ka natahotra sy samy nanangona rano ny vahoaka. Araka ny nambaran’ny tekinisiana ao amin’ny asa vaventy mantsy, dia niniana nendahina mihitsy ireo takelaby ireo mba tsy hahafahan’ny fiara mifamezivezy ary tsy latsaka ny olona 10 farafahakeliny izay vao mahabata ny takelaka iray. Araka ny nambaran’ny mpitatitra iray dia anisan’ny olana ny fiasan’ireo fiara vaventy izay mitatitra kraoma ireo, izay sady manimba lalana no tsy manaja ny vesatra amin’ny fifamoivoizana ka ny fiara mpitatitra olona no lasibatra amin’ny fahasimbana, nanambara ny hitohizan’ izao fitokonana izao izy ireo raha tsy misy fandraisana fanapahankevitra ataon’ny fanjakana. Nandray andraikitra avy hatrany ny tao amin’ny faritra Alaotra Mangoro niaraka tamin’ny asa vaventy tamin’ny fanamboarana ny tetezana tao Sahabe, ka ny talata maraina vao vita izany ary nezahana ny hamatsiana solika ny orinasa Jirama mba tsy hisian’ny fahamaizinan’ny tanana sy ny fahatapahan’ny rano ka voaenjika ara-potoana avokoa izany, fa ny lalana kosa dia mbola manahirana ny vahoaka hatrany hatramin’izao.
Janus R