Rehefa nokarohina nandritra ny iray volana latsaka kely, ireo dahalo nitam-piadianana nangalatra omby 13 tao an-tanànan’ Ambodiamontana, Fokontany Andrafiamena any amin’ny Kaominina ambanivohitry Daraina, Distrikan’i Vohémar, ny 18 jona lasa teo, dia tra-tehaky ny mpanara-dia niaraka tamin’ny mpitandro filaminana tao Ambilobe, ny telo lahy tamin’ireo mpandroba niaraka tamin’ny omby valo saika hamidy, ny dimy jolay teo. Raha araka ny tati-baovao voaray avy any an-toerana, dia saika nodoran’ny Fokonolona velona tamin’ny kodiarana ireto dahalo sarona. Nalaky voafehin’ny mpitandro filaminana anefa izany hatezeram-bahoaka izany, ka atao famotorana lalina ankehitriny ireo mpangalatr’omby voasambotra, ary hatolotra ny fitsarana ao Ambanja tsy hoela ireo dahalo, raha ny loharanom-baovao akaiky ny Polisim-pirenena mandray an-tànana ny raharaha.
Eric Manitrisa