Fahiny, nisy izany « bonze » avy any Azia izany no nonina tao . Tsy voasoratra na koa tsy azo notononina ny anarany fa dia “andrianan’Amboatany” na “Ingahirainy” no nahalalana azy. I Marotia Norovelo , zanakandriana sakalava no nalainy ho vady ( misy milaza fa fianakavian-dRasalimo vadin-dRadama I izy io). Isan’ireo mpiavy avy any ambadik’i Bongolava izy ireo, hamonjy vohitra toerana hanorenam-pangady. Noho ireo mpanaraka azy tsara hofana teo ambany fifehezany dia mora ho azy ny niditra tao Amboatany ka nandresy an’Andrianerinerina, andriana nonina tao.
Tamin’ny fotoana namorian’Andrianampoinimerina ny fanjakany no efa nanda ny hanafihana an’Amboatany Andriamaheritsialaintany, rahalahin’Andrianampoinimerina, mpanolotsaina ninoan-teny tao an-dapa . Raha nandefa tafika teny Amboatany ihany anefa Andrianampoinimerina dia nifanehatra tamin’ny Sakalava nikasa hanafika an’Ambohimanga ireo . Vakitady niparitaka ny Sakalava rehefa nenjehan’ny vatan-dehilahy avy tao Amboatany. Natsangan’Andrianampoinimerina ho isan’ny foko Tsimahafotsy amin’Avaradrano Amboatany ary nataony ho isan’ny mpisava vero niaro ny fanjakany amin’ny fiakaran’ny mpananibohitra.
Niteraka lahy iray ny “Andrianan’Amboatany” sy Marotia Norovelo . Naka vady ny zanak’Andriamaheritsialaintany rahalahin’ Andrianampoinimerina izy io. Niteraka mianadahy ireo dia Ramarotoby sy Be Rafara izay nananontena mandrapahafatiny.
Nalevina teo ambany atsimon’ny vohitra Amboatany Ingahirainy fa taty aoriana dia nafindra teny Iavoambony,avatr’Isahafa.
Liana amin’ny tantara ny taranaka ka hiaraka hitsidika ny vohitr’Amboatany . Ireo avy amin-dRainimbelo, zana-dRamarotoby zafikelin’Ingahirainy ( Ranorovelo, Rajaonarivelo Samuel, Ramanana Paul Toubiarive, Dr Toubisson, Ravelojaona Joseph) no hifamotoana eny amin’ny Kaominina Ambohimanga Rova ny sabotsy 29 marsa .
