Tranga tsy fahita tao amin’ny fokontany Tsarahonenana Ambosaina distrikan’i Toamasina II no nitranga hitan’ny olona tany an-toerana omaly tokony tamin’ny 11ora antoandro.
Tovolahy vao 12 taona monja mantsy no hita faty nihantona tamin’ny tady ny tendany tao an-tranony. Raha ny fanazavana dia any ambanivolon’i Toamasina II ny ray aman-drenin’ity tovolahy maty ity, fa noho ny famonjeny fianarana dia mipetraka irery ny tenany, ka ireo ray aman-dreniny no mamatsy azy ara-tsakafo sy vola momba izany fianarany ao Toamasina suburbaine izany.
Tsy fantatra izany hatreto na famonoan-tena na nisy namono ity tovolahy 12 taona maty nihantona tamin’ny tendany ity. Eo am-panadiadiana izany ny mpitandro ny filaminana.
Malala Didier
