Maty voatifitra ny zanany, naratra mafy voan’ny bala ny vadiny. Nitondra ny mangidy indrindra ity raim-pianakaviana iray teny amin’iny faritra Ambohidratrimo iny ny faran’ny taona teo. Jiolahy efa-dahy nitondra fitaovam-piadiana sy basy no tonga nanafika tao an-tokantranony, tao Ampahimanga, ao amin’ny fokontany Alarobia, kaominina Mananjara, tokony ho tamin’ny iray ora maraina. Araka ny fampitam-baovao azo dia ny varavaran-keliny tao amin’ny efitranon-janany no noezahin’ireo olon-dratsy nosokirina. Raha vao voasikotra izany, avy hatrany dia tsy nisalasala ireto farany nanapoaka ny basy teny an-tanany, nanandrify ny lohan’ilay zanaky ny tompon-trano. Voa teo amin’ny lohany ity tanora vao erotrerony ity ary dia maty tsy tra-drano. Voatsena tamin’ny basy kosa ireo ray aman-dreniny. Naratra mafy ramatoa. Niezaka ny niaro ireto vady aman-janany nasesin’ny jiolahy notofirina ilay rangahy ka nanao izay fara-heriny tamin’ny fitoraham-bato iretsy farany. Rafitra nitsoaka ihany moa ireo olon-dratsy nony farany. Ary izay vao afaka niantso vonjy ity raim-pianakaviana ity. Efa tsy nisy azo natao intsony ny tamin’ilay zanany. Ramatoa kosa nezahina nentina tany amin’ny toeram-pitsaboana. Sotasota ankitsirano sa fanafihana ? Marihana mantsy fa nahazo n’inona n’inona tao amin’ity tokantrano ity ireto jiolahy mpamono olona ireto. Mandeha avy hatrany ny fanadihadiana sy fikarohana ataon’ny mpitandro filaminana.
m.L