Fitaizana zaza kamboty an-dry masera eny Mangarivotra, Ambohipanasina Ambohidratrimo no notafihan’ny jiolahy, ny alarobia hifoha alakamisy lasa teo. Araka ny fampitam-baovao avy tamin’ny zandary dia andiana tovolahy am-polony teo no niditra an-keriny tao amin’io trano fitaizana io. Vokany, rehefa tsy nahazo izay notadiaviny ireto olon-dratsy ireto dia ny masera tompon’andraikitra tao indray no nampiharan’izy ireo herisetra. Naratra vokatr’izany vono nahazo azy izany ity relijiozy ity ka voatery nalefa haingana namonjy toeram-pitsaboana. Tokony ho teo amin’ny misasak’alina teo no tonga ry zalahy ireto, araka ny fampitam-baovao azo. Vaky nandositra avy hatrany ny mpiambina ity akany fanabeazana ity, raha vao nahita ireto andian-jiolahy avy any. Niditra avy amin’ny trano fiangonan’ilay akany izy ireo ary avy hatrany dia nivantana tany amin’ny trano nisy an-dry masera. Noteren’ireto olon-dratsy hamoaka vola ny masera, saingy nandà izany, ary nilaza fa tsy misy vola ao amin’izy ireo. Tezitra tamin’izany valin-teny izany angamba ry zalahy ka avy hatrany dia nikasi-tanana. Rifatra nitsoaka avy eo. Tonga teny an-toerana ny zandary nanao ny fanadihadiana rehetra mahakasika ity tranga ity ary efa mandeha ny fikarohana ireto andian-jatovo, tsy valahara ireto. Tsy milamina tokoa ny tany, fa na hatramin’ireo relijiozy sy mpikarakara ireo sahirana, lasibatry ny jiolahy.
m.L