Nitrangan’ny lozam-pifamoivoizana mahatsiravina tetsy Miadana, Ambohimanjaka, distrikan’ Ambohidratrimo ny sabotsy lasa teo. Namoy ny ainy tao anatin’izany ny mpanamory fiarakodia iray fantatra amin’ny anarana hoe Kael, mpiara-dalàna amin’i Titi Rahamefy, araka ny fanambarana nataon’ny klioba nisy azy avy ao Asatana. Marihina fa tao anatin’ny andrana sy ny fizahana lalàna, ho an’ny fifaninana izay atao eny an-toerana izy, no izao niharan-doza izao, raha ny angom-baovao azo hatrany. Tamin’io fotoana io, araka ny filazan’ireo nanatri-maso dia teo am-pandehana mafy amin’ny fiolanana no tsy voatana intsony ny fiara « Renault » nentiny. Nivadibadika imbetsaka ihany ity fiara kely ity vao nijanona ary potika tanteraka. Nambaran’ireo nanatri-maso sasany aza fa toa voatery nosokirina tao anatin’izany mihitsy ny mpamily ilay fiara, efa tsy nisy aina intsony. Efa tonga teny an-toerana nijery ifotony ny zava-nisy moa ireo tompon’andraikitra isan-tsokajiny avy, niaraka tamin’ny mpitandro filaminana. Tsiahivina fa fanindroany tamin’ity izay no nisy mpanamory namoy ny ainy nandritry izany “reconnaissance” lalana ho amin’ny fifaninanana hazakazaka fiarakodia na môtô izany. Niara-nahatadidy ny rehetra tamin’ilay lozam-pifamoivoizana nahatsiravina ihany koa nitranga tetsy Imerinkasinina, ary mpanamory môtô iray ihany koa no anisan’ny namoy ny ainy tao anatin’izany.
m.L
