Efa tamin’ny alahady no tsy hita ity lehilahy ity. Omaly vao maraina kosa no hitan’ny fokonolona, nantsigevan’ny rano an-tanimbary, teny amin’iny faritra Ambohijanaka iny, ny vatana mangatsiakany. Efa simba tanteraka ny razana, ary nahitana ratra teo amin’ny lohany sy ny sofiny. Nisy namono ve ? Nambaran’ireo tompon’andraikitra nizaha izany teny an-toerana, fa mety efa teo amin’ny telo andro teo na efatra teo no nahafaty ity lehilahy manodidina ny 35 taona ity. Araka ny fanazavana azo, dia nandeha fiara, niaraka tamin’ny namany telo lahy, handeha hisotrosotro teny amin’iny faritra By pass iny ity lehilahy ity no tsy hita tany, nanjavonana tampoka izy. Nijanona teo amin’io toerana nahitana ny razana io mihitsy izy ireo tamin’io fotoana io, raha ny vaovao voaray. Tsy fantatra mihitsy izay nitranga tamin’io fotoana io. Raha ny fantatra mantsy, dia nilaza ny handeha hivalan-drano izy tamin’izay, tany anefa dia tsy niverina intsony. Niveri-maina ireo namany ary nampilaza ny vaovao ratsy tany amin’ny fianakavin’ilay tsy hita. Raikitra avy hatrany ny fikarohana, taorian’ny fitarainana nataon’ireto farany tany amin’ny zandarin’ Andoharanofotsy. Ny mahavariana tamin’ity raharaha ity, raha ny fanazavana azo, dia efa nezahina natao sahavao ity toerana ity, saingy very an-javony fotsiny ary dia izao nipoitra ho azy izao fotsiny. Novonoina tany ho any ve dia naverina natsipy teo, nony taty aoriana ? Efa mandeha ny famotorana ataon’ireo zandary eny an-toerana amin’izao. Ary amin’izay lalana izay hatrany, voatery notazonin’ireo mpitandro filaminana ireo namany telo lahy, niaraka tamin’ity lehilahy ity farany, atao fanadihadiana. Naterina avy hatrany teny amin’ny tranom-patin’ny Hjra ny razana, ary efa tonga naka azy teny ny fianakaviany.
m.L
