Vao avy nahavita ny asa ratsiny tetsy Ambohimangakely ry zalahy dia nitsoaka nihazo an’Antsirabe, toerana niaviny. Ny iray no efa voasambotra, mbola hifampitadiavana kosa ny namany.
Toerana fanasana fiara iray tetsy Betafo, Ambohimangakely no niharan’ny fandrobana ny alin’ny 05 hifoha 6 janoary lasa teo. Fitaovana maromaro fampiasa tao amin’io toerana no lasan’ireo olon-dratsy, niaraka tamin’ny môtô Racing King iray sy vola aman’hetsiny maromaro. Tombana ho an-tapitrisany maromaro tany ho any no tombam-bidin’ireo entana norobain’ireo jiolahy tamin’io fotoana io. Tamin’ny nidinan’ny zandary avy ao amin’ny tobim-paritra Ambohimangakely teny an-toerana anefa dia tsikaritra nandritra ny fanadihadiana fa tsy nisy vaky na varavarana simba tao amin’izany toerana fanasàna fiara izany. Azo eritreriterina avy hatrany araka izany fa olona tsy lavitra tao, mahafantatra tsara ilay trano sy ny fisian’ireo fitaovana lafovidy ireo no nahavanon-doza. Niantefa avy hatrany tamin’ireo mpiasany roalahy, izay efa nesorina tao araka izany ny ahiahin’ny tompon’ny toerana.
Niroso tamin’ny fanadihadiana ireo zandary, ary fantatra taorian’ny angom-baovao azo fa lasa nandositra tany Antsirabe ireo mpiasa ireo. Ny faran’ny herinandro teo, tra-tehaka tany an-toerana ny iray tamin’ireto mpiasa ireto, niaraka tamin’ilay môtô. Fantatra kosa fa ny sasantsany tamin’ireo entana dia natoby tao amin’ny tokatrano iray tetsy Ambodivoara Ambohimangakely. Olona roa no tra-tehaka tao ary nentina nanaovana fanadihadiana. Raha ny fampitam-baovao azo avy amin’ny zandary dia mbola eo am-pikarohana ilay naman’izy ireo, izay fantatra fa nitondra ireo ambin’entana sy ny vola ireo mpitandro filaminana. Izy telolahy ireto kosa, notanana natao andrimaso tao amin’ny tobin’ny zandary, ary hatolotra eny amin’ny Fampanoavana anio.
m.L
