Mihorohoro tanteraka ireo vahoaka monina ao amin’ny toerana an-tsoina hoe Manankasina III, fokontany ambohibe, kaominina Ambohimangakely fa misy ny fikasana hanala azy ireo amin’ny toeram-ponenany ary tsy maintsy harodana ny tranon’izy ireo. Araka ny fantatra dia tanin’ny Fiangonana katolika io toerana io ka halain’ny tompony ny fananany. Ireto mponina ireto anefa milaza fa efa tena nanajary ny toerana ary efa nonina teo nandritra ny taona maro. Misy amin’izy ireo no efa namboly hazo izay efa mahatratra 6 metatra mihitsy amin’izao fotoana izao ka maniry ny mba hahazo misitraka io tany io ka nanao ny dingana rehetra hahatongavana amin’izany. Efa tonga hatrany amin’ny Fitsarana ny raharaha saingy nahazo rariny ny Fiangonana katolika. Noho izany, dia efa nisy ny fikasana hanao izao fandrodanana izao ny 25 Aprily 2025 saingy najanon’ny Fitsarana ny fanaovana izany tamin’io fotoana io. Ny 17 martsa teo anefa dia nisy mpisolovava nidina teny an-toerana namory ny olona mba hampanao sonia ireo mponina voakasika ka maniry hividy ny tany izay itoerany raha mbola te-hijanona eny. Nambara tamin’izany fa 125 000 ariary ny metara tora-droa amin’ny tany k any 20 martsa izao no tsy maintsy handoavana ny antsa-bidy raha tsy izay dia tsy maintsy atao ny fandrodanana. Eo Indrindra no tena mampiasa saina ny sasany amin’ireo mponina satria maro amin’izy ireo no milaza fa mahantra ka tsy hahatakatra izany vola izany. Araky ny voalazan’ireo mponina dia manakiky ny didim-pitsarana izy ireo fa saingy mangataka kosa ny mba hisian’ny marimaritra iraisana ka hijerena ny momba azy ireo fa betsaka no tsy afaka hiditra amin’io varotra napetraka io noho ny tsy fahasahiranana eo amin’ny lafiny fivelomana.
T.M.
Commenter :tena mampalaelo kosa nama a,f’angaha moa ny lalana ts we rehefa nanajary enw d mahazo mangataka,d mikasika anle we mbola manana tany eto ny colon,?Nga moa tsika mbola zanatany,?Ekena we mbola ts mahaleo tena fa mba souverainete kosa rangah zani a,nisy niteny talou we hozaraina tany ny tanora.kay leiz nouzalon fotsin.