Ny alarobia 12 febroary vao mangiran-dratsy tamin’ ny iray ora maraina no tonga nandroba tao amin’ ity tokantrano iray ireto olon-dratsy . Ny varavarankely no nopoirin-dry zalahy ary nisy tamin’ izy ireo no nitondra basy kilalaon-jaza , tsy nahahetsika ny tao an-trano koa dia nanarampo ireto mpanafika.Lasa tamin’ izany ny vola mitentina 200 000 ar, solosaina iray, miaraka amin’ ny coffer-fort izay nitahiry basy PA 9mm marika VATRO sy cartouche 50 na bala. Voafitaka tokoa ny tao an-trano nohon’ ny haizina ka tsy nahatsikaritra ity basy plastika.
Tsy hay marina moa izay tao an-tsain’ ireto mpandroba fa dia mbola nentin’ ireto farany ihany koa ny zazavavikely vao efatra ambin’ ny folo taona monja , saika ny mbola hanao takalon aina angamba no tao an’ eritreriny, saingy tsy tapakevitra tampoka dia navotsitr’ izy ireo ihany.
Efa eo am-pelatanan’ ny Borigadin’ ny zandarimaria Ambohimangakely moa ny raharaha amin’ izao ary izy ireo ihany koa no miandraikitra ny famotorana sy ny fitadiavana izay ho mety nahavanon-doza.
ALEM
