Mbola fanafihana mitam-piadiana ihany no nitranga tetsy Ambohimangakely, omaly vao mangiran-dratsy. Valo lahy nitondra basy no nanao amboletra niditra tao an-tranona mpisolo vava vehivavy iray mipetraka eny an-toerana. Vokany, noratrain’ireo olon-dratsy izy mivady tompon-trano. Nofatoran’izy ireo tamin’ny lambam-pandriana ihany koa ny zanany mianadahy. Lasan’izy ireo tamin’izany ny vola tao an-trano rehetra, niampy ireo fitaovana sarobidy, toy ny finday, ny solosaina entin-tanana, ary entana maro hafa. Tokony ho tamin’ny roa ora maraina tany ho any no niseho ity fanafihana ity. Nihanika tamboho ry zalahy tamin’io fotoana io. Henon’ilay mpiambina anefa ny nidiran’izy ireo tao amin’ilay tanàna saingy tsy afa-nanoatra ity farany. Basy avy hatrany mantsy no nitsena azy ka dia nangina. Nangaihay fotsiny teo anoloan’ny zava-nitranga. Nitondra « pince coupante » izy ireo tamin’io fotoana io, ka tamin’ny alalan’izay fitaovana izay no nanapahany ny karakara vy fiarovana teo amin’ny varavaran-kely. Vao tafiditra izy ireo, ny namatotra ireo ankizy no nataony voalohany. Avy eo vao niroso tany amin’ny efitrano nisy azy mivady. Asa raha somary nanohitra izy mivady ireto, avy hatrany mantsy dia daroka vody basy no niantefa teny amin’ilay mpisolo vava sy ny vadiny. Naratra mafy ireo vokatr’izay. Nigalabona tao an-trano kosa iretsy jiolahy rehefa voafehy ny olona rehetra ary nibata izay zakany sy lasa nitsoaka. Efa mandeha ny fikarohana ireo olon-dratsy ataon’ny zandary eny an-toerana. Nentina namonjy toeram-pitsaboana haingana kosa ireo naratra.
m.L
