Akory ny hatairan’ireo mponina teny amin’iny faritra Ambohitrakely iny, ny voalohan’ny herinandro teo rehefa nahita fatin-jaza, notaritaritin’ny alika tao anaty daba-pako iray teny an-toerana. Efa rotidrotika tanteraka ny vatany sy ny ratsam-batany sy ny lohany tamin’ny fotoana nahitàn’ireo mponina azy. Raha ny fanazavàna azo dia zazarano nisy nanary tao amin’io daba-pako io ity hita ity, ankevitry ny alin’ny alahady hifoha alatsinainy teo. Tsy nisy nahita ary tsy fantatra rahateo ihany koa izao reny nahavanon-doza nahavita izany. Nampandrenesina teo no ho eo avy hatrany moa ireo tompon’andraikitra teo anivon’ny fokontany sy ny mpitandro filaminana, izay tonga teny an-toerana nijery ifotony ny zava-nisy ary efa mandeha ny famotorana.
Fa ankoatr’ity teny Ambohitrakely ity dia fantatra ihany koa fa zazavavikely vao teraka, mbola miaraka amin’ny tadim-poitrany no nisy nanary teny amin’iny faritra Anosibe iny, ny voalohan’ny herinandro teo hatrany. Nataon’ilay tsy mataho-tody tao anaty harona « sachet » ary natsipiny tao anaty tatatra teny an-toerana. Efa vatana kely mangatsiaka no hitan’ireo olona sendra nandalo tamin’izany faritra izany. Tonga teny ihany koa ireo tompon’andraikitra ary nitondra ny razana nihazo ny tranom-paty. Efa eny am-pelan-tanan’ny manampahefana moa ny raharaha, hikarohana izay nahavanon-doza. Tsapa fa maromaro ihany ireo zaza vao teraka narian-dreniny tato ho ato izay. Marihana fa heloka bevava ary henjehin’ny lalàna tanteraka ny toe-javatra tahak’itony, izay mitovy tsy misy valaka amin’ny famonoana olona ankitsirano sy hiniana atao ihany.
m.L
