Tsy ny fanadihadian’ny mpitandro ny filaminana akory no nahafantarana ny sasany tamin’ireo olon-dratsy izay nanao fanolanana sy namono ny olona nanaovany an’izany rehefa avy eo. Nisy tovovavy iray niharan’izany indray tetsy Ambohitsoa tamin’ny herinandro lasa teo. Nitovy tamin’izay nahazo ireo vehivavy hafa ihany ny nanjo io farany. Izany hoe naolana dia notontaina vatobe avy eo ny lohany mba ho faty. Ny tsy nampoizin’ireo olon-dratsy tamin’ity indray mitoraka ity, dia tsy maty akory ilay tovovavy. Mbola nanana aina kely izy nandadizana ary nanao izay nahitan’ny olona azy. Nentina avy hatrany tamin’ny sampana fameloman’aina ary mbola any aza hatramin’izao, raha araka ny vaovao azo teo an-toerana. Nahavita nanondro ny olona nahavanon-doza taminy izy ary nanomboka teo no nisy ny fisamborana. Raha ny fantatra, dia olona roa no nalefa eny Antanimora taorian’ny didy famonjana vonjimaika avy amin’ny fampanoavana. Handrandrain’ny mponina eo an-toerana ny mba handehanan’ny fanadihadiana ity raharaha ity hatramin’ny farany. Niteraka tahotra sy horohoro loatra mantsy ity vono olona nisesisesy teo Ambohitsoa ity. Olona monina ao Morarano, raha araka ny loharanom-baovao hatrany, no tompon’antoka tamin’ireo heloka bevava ireo. Vehivavy dimy raha hiverenana kely no niharan’ny vono olona sy fanolanana teo an-toerana. Nisy ny mpianatra kely izay handeha hody no nalain’ireo an-keriny , dia naolana ary novonoina. Nisy ihany koa ny mpiasa mody alina izay andrasan’ireo ary novonoina rehefa nanaovana filan-dratsy. Isan’ny mbola tao anaty lisitry ny maty ihany koa ny ramatoa lehibe iray efa 70 taona; izay mbola naolan’ny mpanao ratsy hatrany ary novonoina nony avy eo.
D.R
